Spurt og svarað

Hvað er séreignarsparnaður?

Vegna ákvæða laga um frestun skattlagningar, sem fela það í sér að draga má greidd lífeyrisiðgjöld sem nema allt að 6% af heildarlaunum frá skattstofni, þá er heimilt að greiða allt að 2% af heildarlaunum sem iðgjald í séreignarsjóð til viðbótar við lágmarksiðgjald í lífeyrissjóð. Sjóðfélagar í séreignarsjóð eiga þá jafnan kost á mótframlagi frá launagreiðanda sem getur numið allt að 2% til viðbótar.

Hvað er Sér-leið?

Sér-leið er þægilegt sparnaðarform sem hefur það markmið að fjárfestingarstefna fylgi aldri sjóðfélaga og áhættuvali hans. Það er eðlilegt að draga úr vægi áhættumeiri fjárfestinga eftir því sem fólk eldist og nær dregur lífeyrisgreiðslum. Sjóðfélagar hafa val um Leið I og Leið II til 55 ára aldurs en flytjast þá sjálfkrafa í Leið III sem ávaxta séreignarsparnaðinn á verðtryggðum innlánsreikningum.

Hvaða fjárfestingarleið á að velja í séreignarsparnaði?

Valin fjárfestingarleið fer eftir áhættuþoli og aldri hvers og eins. Almenna reglan er sú að eftir því sem sjóðfélagi er yngri því meira er áhættuþol hans, hann hefur lengri tíma til að ávaxta sparnað sinn og þolir því frekar sveiflur sem fylgja hlutabréfaverði. Jafnan er það svo að fjárfestingar í skuldabréfum eru áhættuminni en fjárfestingar í hlutabréfum. Sögulega séð hafa hlutabréf gefið af sér hærri ávöxtun en skuldabréf en áhætta og sveiflur eru jafnframt meiri.

Hvers vegna er fjárfest í erlendum hlutabréfum?

Til að minnka álag á íslenska hagkerfið ásamt því að dreifa áhættu sjóðfélagans.

Hvenær er hægt að fá séreign sína útborgaða?

Séreignarlífeyrir er laus til útborgunar við 60 ára aldur.

Hvernig sæki ég um? Hvert þarf ég að leita?

Sjóðfélagi í Séreign LSR getur farið inn á vef sjóðsins, www.lsr.is og prentað út umsókn um útgreiðslu. Einnig getur hann haft samband við þjónustufulltrúa lífeyrisdeildar í síma 510-6100 og fengið sent umsóknareyðublað eða komið á skrifstofu LSR, Bankastræti 7, 101 Reykjavík og sótt um útgreiðslu.

Hvernig er útgreiðslum hjá Séreign LSR háttað? Hver er afgreiðslufrestur umsókna?

Greitt er út mánaðarlega, fyrsta dag hvers mánaðar. Umsókn þarf að hafa borist í síðasta lagi 20. dag mánaðar fyrir næstu útborgun.

Er skattur greiddur af séreignarsparnaði?

Við útborgun er greiddur tekjuskattur af fjárhæðinni samkvæmt þrískiptri þrepaskiptingu tekjuskatts. Sjóðurinn sér um að standa skil á tekjuskatti.

Hvað þýðir skattfrestun?

Vegna ákvæða laga um frestun skattlagningar, sem fela það í sér að draga má greidd lífeyrisiðgjöld sem nema allt að 6% af heildarlaunum frá skattstofni. Við útborgun séreignarlífeyris þá er skatturinn greiddur.

Get ég nýtt skattkortið mitt?

Já þú getur nýtt skattkortið þitt ef það er ekki fullnýtt annars staðar.

Sérstök úttekt á séreignarsparnaði: Hversu mikið get ég fengið greitt út?

Samþykkt hefur verið heimild til útborgunar á séreignarlífeyrissparnaði allt að 6,25 milljónir. Á árinu 2009 var opnað fyrir útborgun á einni milljón króna, fjárhæðin var hækkuð í 2,5 milljónir á árinu 2010 og hækkuð í 5 milljónir í byrjun árs 2011, samþykkt á Alþingi í september 2011 að auka við heimildina og sú heimild framlengd í desember 2011. Þar með verður heimilt að taka út samanlagt 6,25 milljónir króna af séreignarsparnaði svo fremi að rétthafi hafi átt þá fjárhæð 1. janúar 2012.

Greiðslur dreifast á allt að 15 mánuði fyrir þá sem eiga 6,25 milljón kr. og nýta sér útborgunarheimildina að fullu. Fjárhæðin er greidd út að frádreginni staðgreiðslu skatta og með fyrirvara um heimild ríkisskattstjóra sem hefur eftirlit með útgreiðslu séreignarsparnaðar.

Sérstök úttekt á séreignarsparnaði: Get ég haldið áfram að greiða í séreignarsparnað þó svo ég taki út allt að 6,25 milljónir kr.?

Já, sjóðfélagi getur haldið áfram að greiða í séreignarsjóð meðfram þessari úttekt. Úttekt séreignarsparnaðar jafngildir ekki uppsögn samnings.

Sérstök úttekt á séreignarsparnaði: Hvenær rennur umsóknarfrestur út? Get ég sótt um síðar?

Umsóknarfrestur rennur út 01.10.2012. Hægt er að sækja um fram að þeim tíma, eða í síðasta lagi 30. september 2012. Séreignarsparnaður verður svo greiddur út næstu 15 mánuði eftir að umsókn berst.

Sérstök úttekt á séreignarsparnaði: Mun útgreiddur séreignarsparnaður skerða aðrar tekjur mínar?

Útgreiðsla séreignarsparnaðar hefur ekki áhrif á bætur samkvæmt lögum um almannatryggingar og lögum um félagslega aðstoð. Þá hefur útgreiðslan ekki áhrif á greiðslu húsaleigubóta, barnabóta, vaxtabóta eða atvinnuleysisbóta.