Ávöxtun LSR
Nafnávöxtun LSR á árinu var 6,6% sem samsvarar 2,8% raunávöxtun. Hrein raunávöxtun, þ.e. þegar rekstrarkostnaður hefur verið dreginn frá hreinum fjárfestingartekjum, var 2,7% samanborið við 7,1% árið 2024. Meðaltal hreinnar raunávöxtunar LSR síðustu fimm árin er 1,3% og meðaltal síðustu tíu ára er 3,8%. Ávöxtun einstakra deilda LSR má sjá í töflunum hér fyrir neðan. Ávöxtun er reiknuð samkvæmt reglum um ársreikninga lífeyrissjóða.
Ávöxtun ársins
| Ávöxtun ársins | A-deild | B-deild | LSR |
| Nafnávöxtun | 6,3% | 8,9% | 6,6% |
| Hrein raunávöxtun | 2,4% | 4,7% | 2,7% |
| Meðaltal hreinnar raunávöxtunar síðustu 5 ára | 1,4% | 1,2% | 1,3% |
| Meðaltal hreinnar raunávöxtunar síðustu 10 ára | 3,9% | 4,0% | 3,8% |
Ávöxtun ársins - Séreign
| Ávöxtun ársins | Séreign Leið I | Séreign Leið II | Séreign Leið III | Tilgreind séreign |
| Nafnávöxtun | 6,4% | 7,4% | 5,6% | 6,2% |
| Hrein raunávöxtun | 2,5% | 3,4% | 1,7% | 2,3% |
| Meðaltal hreinnar raunávöxtunar síðustu 5 ára | 0,6% | -0,3% | 0,9% | - |
| Meðaltal hreinnar raunávöxtunar síðustu 10 ára | 3,7% | 2,5% | 1,3% | - |
Hrein eign LSR til greiðslu lífeyris var 1.663,9 ma.kr. í árslok 2025 sem er um 97,2 ma.kr. aukning á milli ára, eða 6,2%. Þrátt fyrir að markaðir væru sveiflukenndir á árinu skiluðu bæði innlend og erlend hlutabréf jákvæðri ávöxtun. Skuldabréf skiluðu ágætri ávöxtun og reyndust vænlegur kostur í því efnahagsumhverfi sem ríkti á árinu. Hreinar fjárfestingartekjur sjóðsins voru 103,7 ma.kr. fyrir árið 2025, sem er talsvert minna en árið áður þegar fjárfestingartekjurnar voru 173,1 ma.kr.
Töluverðar sveiflur hafa verið á verðbréfamörkuðum undanfarin 10 ár en eins og sjá má á meðfylgjandi grafi hafa fjárfestingartekjur sjóðsins verið yfir 100 ma.kr. sex af síðustu tíu árum. Árið 2022 sker sig talsvert úr, enda er það eina árið síðasta áratuginn sem skilaði neikvæðum fjárfestingartekjum.
Á tíu ára tímabili, frá upphafi árs 2016 til ársloka 2025 hefur samanlögð hrein eign til greiðslu lífeyris aukist um 1.081 ma.kr., úr 582,9 ma.kr. í 1.663,9 ma.kr. Af aukningu eigna á tímabilinu voru fjárfestingartekjur 85,3% eða 921,7 ma.kr. Innborganir ríkissjóðs inn á skuldbindingar og uppgjör skuldbindinga ásamt greiðslu lífeyrisauka námu 236,0 ma.kr. á tímabilinu. Á móti hafa greiðslur lífeyris og kostnaður verið 110,3 ma.kr. umfram iðgjaldagreiðslur og greiðslur vegna lífeyrishækkana í B-deild.
Inn- og útflæði einstakra deilda sjóðsins hefur verið afar ólíkt undanfarin tíu ár og þar af leiðandi hefur þróun eigna verið það einnig. Eignir A-deildar hafa til dæmis aukist um 1.069,5 ma.kr. á tímabilinu á meðan eignir B-deildar hafa minnkað um 8,7 ma.kr. Eignir Séreignar hafa aukist um 20,2 ma.kr. eða 151,2% á síðustu tíu árum.