Erlendar fjárfestingar – UFS-mat
Fjárfestingar LSR á erlendum mörkuðum eru í gegnum verðbréfa- og fjárfestingarsjóði. Það þýðir að LSR er ekki beinn fjárfestir í einstökum félögum heldur fjárfestir í sjóðum sem aftur fjárfesta í hlutabréfum og skuldabréfum á heimsvísu.
Mat á umhverfis-, félagsþáttum og stjórnarháttum (UFS-þáttum) fyrir erlent eignasafn er því byggt á einkunnagjöf þeirra sjóða sem fjárfest er í. Sjóðirnir sjálfir hafa markað sér UFS-viðmið og eru misjafnir, allt frá því að vera vísitölusjóðir með væg UFS-markmið yfir í sjóði sem gætu flokkast undir það að vera áhrifafjárfestar með skýr og öflug UFS-markmið.
Einkunnagjöf frá Morningstar
Við UFS-mat á erlendu eignasafni er stuðst við áhættumat frá Morningstar. Slíkt mat fá allir skráðir verðbréfasjóðir sem eru með mælanlegan áhættustýringarramma utan um meirihluta eigna í eignasafni hvers sjóðs. Morningstar notar skalann 1 – 5, þar sem 5 er besta einkunn við mat á UFS-áhættumati sjóða, 4 yfir meðallagi, 3 í meðallagi, 2 undir meðallagi og 1 lægsta einkunn við mat á UFS-áhættu sjóða.
| Einkunn | Skýring | |
| 5: Hátt | 🌐︎🌐︎🌐︎🌐︎🌐︎ | Framúrskarandi stjórnun hvað varðar UFS-þætti |
| 4: Yfir meðallagi | 🌐︎🌐︎🌐︎🌐︎ | Góð stjórnun hvað varðar UFS-þætti |
| 3: Í meðallagi | 🌐︎🌐︎🌐︎ | Í meðallagi góð stjórnun hvað varðar UFS-þætti |
| 2: Undir meðallagi | 🌐︎🌐︎ | Slök stjórnun hvað varðar UFS-þætti |
| 1: Lágt | 🌐︎ | Ekki fullnægjandi stjórnun hvað varðar UFS-þætti |
UFS-einkunn erlendra sjóða í eignasafni LSR
Lokaeinkunn hvers sjóðs ræðst af heildareinkunn UFS-áhættumats. Sjóðum er raðað í flokka (Morningstar Global Category) út frá fjárfestingarstefnu og eignasamsetningu og þeir metnir hlutfallslega miðað við aðra sjóði innan sama flokks. Samkvæmt aðferðafræði Morningstar tryggir slík nálgun að samanburður sé byggður á samræmdum forsendum og stuðlar þannig að marktækara mati á sjálfbærniáhættu sjóða.
Ef sjóður fær fimm í einkunn er stigagjöf lág, en það gefur til kynna að UFS-áhætta sjóðsins sé undir góðri stjórn og er þar af leiðandi lítil. Það öfuga gerist þegar sjóður fær einn í einkunn en þá er stigagjöf há, UFS-áhætta ekki undir góðri stjórn og þar af leiðandi mikil áhætta.