Í ársskýrslunni er birt ávarp stjórnarformanns LSR, sem fjallar m.a. um stöðu sjóðsins og merkisáfanga sem náðust í rekstrinum á síðasta ári, nýjungar í þjónustu LSR, áherslur stjórnar þegar kemur að þátttöku í íslensku viðskiptalífi og mikilvægi þess að líta til sjálfbærni í rekstri og fjárfestingum.
Á árinu 2024 rauf eignasafn LSR 1.500 milljarða múrinn í fyrsta skipti og voru heildareignir sjóðsins 1.567 milljarðar króna í árslok. Þá greiddi sjóðurinn meira en 100 milljarða króna í lífeyrisgreiðslur á árinu, sem er í fyrsta sinn sem greiðslur sjóðsins eru umfram það mark. Hreinar fjárfestingartekjur voru 173 milljarðar króna, sem er það næstmesta á einu ári í sögu LSR.
Eins og áður sagði er ársskýrslan með nýju sniði. Síðustu ár hefur útgáfan verið á PDF-formi, en í ár er hún gefin út á vefformi. Þar er einfalt að fletta milli kafla til að finna þær upplýsingar sem leitað er að, auk þess sem öll gröf eru gagnvirk, þannig að t.d. má sjá ítarlegri tölur í súlu- og línuritum með því að setja bendilinn yfir gröfin, eða fletta milli flipa til að sjá tölur og gögn fyrir einstakar deildir.
Hér fyrir neðan má sjá dæmi um gagnvirkt graf í ársskýrslunni. Sé músinni haldið yfir súlunum birtast tölurnar á bak við hverja súlu, auk þess sem hægt er að sjá upplýsingar fyrir einstakar deildir með því að fletta milli flipa.
