Eftirlaun og lífeyrir fyrir sjóðfélaga erlendis
Ef eftirlauna- eða lífeyrisþegar LSR eru með lögheimili erlendis þurfa þeir að staðfesta árlega rétt sinn til áframhaldandi greiðslna. Í sumum tilvikum þarf að senda inn gögn en í öðrum dugar að skrá sig inn á Mínar síður.
- Eftirlaunaþegar þurfa að skrá sig inn á Mínar síður
- Makalífeyrisþegar þurfa að senda inn staðfestingu á núverandi hjúskaparstöðu frá búsetulandi
- Örorkulífeyrisþegar þurfa að senda inn afrit af síðasta skattframtali
Þegar komið er að staðfestingartíma sendir sjóðurinn áminningu til lífeyrisþega og því er mikilvægt að LSR sé með rétt netfang skráð svo áminningin komist til skila. Hægt er að skrá netfang á mínum síðum. Í áminningunni kemur fram hvenær skilafresturinn er og hvaða gögnum þarf að skila.
Einnig birtist tilkynning á Mínum síðum, þar sem bæði makalífeyris- og örorkulífeyrisþegar geta sent inn umbeðin gögn með einföldum hætti. Við mælum með því að sú innsendingarleið sé notuð, en einnig má senda sjóðnum gögnin með tölvupósti á netfangið lifeyrir@lsr.is eða hefðbundnum pósti á heimilisfang sjóðsins.
Vinsamlegast athugaðu að lífeyrisgreiðslur stöðvast ef gögn berast ekki til LSR innan þess tíma sem gefinn er upp.
Lífeyrisgreiðslur sem stöðvast eru greiddar afturvirkt, að hámarki 4 ár í samræmi við fyrningarlög, skili sjóðfélagi inn fullnægjandi gögnum sem staðfesta rétt á áframhaldandi greiðslum.
Árleg staðfesting
- Eftirlaun: Innskráning á Mínar síður
- Makalífeyrir: Staðfesting á hjúskaparstöðu
- Örorkulífeyrir: Skattframtal
Skattlagning á lífeyristekjum
Í lögum um tekjuskatt segir að almennt skuli þeir sem búa erlendis og hafa tekjur frá Íslandi greiða skatt af þeim tekjum á Íslandi.
Tvísköttunarsamningar
Undanþága frá þeirri reglu gæti verið fyrir hendi ef lífeyrisþegi er búsettur í landi sem Ísland hefur gert tvísköttunarsamning við. Í sumum tvísköttunarsamningum eru ákvæði að lífeyrisþegar greiði skatt af íslenskum lífeyrisgreiðslum í búsetulandi en ekki á Íslandi. Í þeim tilfellum er hægt að sækja um undanþágu hjá Skattinum. Skatturinn sendir staðfestingu um undanþágu til LSR sé umsóknin samþykkt. Lífeyrisþegi verður þá skráður undanþeginn skatti frá þeim tíma sem staðfestingin berst. LSR endurgreiðir ekki skatt sem hefur verið greiddur áður en undanþágan berst. Það er gert með endurgreiðslu frá Skattinum við næstu álagningu.
Athygli er vakin á því að Skatturinn veitir einungis undanþágu fyrir yfirstandandi ár. Lífeyrisþegi þarf því að endurnýja undanþáguna í upphafi hvers árs. Skatturinn tekur við umsóknum um endurnýjun frá 1. desember ár hvert.
Vinsamlegast athugaðu að:
- Lögum samkvæmt verður staðfesting á undanþágu að berast til LSR frá Skattinum.
- LSR ekki heimilt að sækja um undanþágu fyrir hönd lífeyrisþega.
- Undanþágan fellur úr gildi þegar lífeyrisþegi flytur til Íslands og það er á hans ábyrgð að tilkynna það til LSR til að koma í veg fyrir innheimtu á vangreiddum skatti í næstu álagningu Skattsins.
Hver getur sótt um undanþágu?
LSR bendir lífeyrisþegum á að hafa samband við Skattinn til að kanna rétt sinn á undanþágu. Tvísköttunarsamningar eru misjafnir og líta þarf til eðli lífeyristekna og hvort lífeyrisþegi sé íslenskur eða erlendur ríkisborgari.
Samkvæmt upplýsingum frá Skattinum í október 2024 geta lífeyrisþegar sem búa á Norðurlöndunum ekki sótt um undanþágu á staðgreiðslu vegna lífeyrisgreiðslna.
Hér má finna umsóknareyðublaðið hjá Skattinum: