Hafir þú einhvern tímann greitt iðgjald til B-deildar en hætt því án þess að hefja töku eftirlauna átt þú eldri réttindi í B-deild. Ef þú greiddir iðgjöld í meira en 3 ár eru lífeyrisréttindin verðtryggð fram að eftirlaunatöku og fylgja eftir það launavísitölu opinberra starfsmanna.

Ef þú greiddir til B-deildar skemur en í þrjú ár eru réttindin óverðtryggð. Eftir að taka eftirlauna hefst fylgja þau hins vegar launavísitölu opinberra starfsmanna. Óveruleg réttindi sem eru undir ákveðinni viðmiðunarupphæð eru greidd með eingreiðslu.

Eftirlaunataka úr B-deild LSR er ávallt háð því skilyrði að sjóðfélagi sé ekki í starfi hjá stofnun eða sveitarfélagi í 50-100% starfshlutfalli. Sú regla gildir einnig fyrir þá sjóðfélaga sem eiga eldri réttindi í B-deild en greiða iðgjöld til A-deildar af slíku starfi. Ef þú átt réttindi í B-deild og ert enn í 50-100% starfi getur þú haft samband við ráðgjafa LSR til að kanna hvort þú eigir kost á að fá greidd eftirlaun.

Eftirlaun frá B-deild er í fyrsta lagi hægt að fá greidd frá 65 ára aldri (nema um 95 ára reglu sé að ræða). Ef sótt er um eldri réttindi eftir að greiðslur hefðu getað hafist fást réttindin greidd afturvirkt frá þeim tíma, þó að hámarki fjögur ár aftur í tímann.