Eftirlaun og lífeyrir fyrir sjóðfélaga erlendis
Ef eftirlauna- eða lífeyrisþegar LSR eru með lögheimili erlendis þurfa þeir að staðfesta árlega rétt sinn til áframhaldandi greiðslna. Í sumum tilvikum þarf að senda inn gögn en í öðrum dugar að skrá sig inn á Mínar síður.
- Eftirlaunaþegar þurfa að skrá sig inn á Mínar síður
- Makalífeyrisþegar þurfa að senda inn staðfestingu á núverandi hjúskaparstöðu frá búsetulandi
- Örorkulífeyrisþegar þurfa að senda inn afrit af síðasta skattframtali
Þegar komið er að staðfestingartíma sendir sjóðurinn áminningu til lífeyrisþega og því er mikilvægt að LSR sé með rétt netfang skráð svo áminningin komist til skila. Hægt er að skrá netfang á mínum síðum. Í áminningunni kemur fram hvenær skilafresturinn er og hvaða gögnum þarf að skila.
Einnig birtist tilkynning á Mínum síðum, þar sem bæði makalífeyris- og örorkulífeyrisþegar geta sent inn umbeðin gögn með einföldum hætti. Við mælum með því að sú innsendingarleið sé notuð, en einnig má senda sjóðnum gögnin með tölvupósti á netfangið lifeyrir@lsr.is eða hefðbundnum pósti á heimilisfang sjóðsins.
Vinsamlegast athugaðu að lífeyrisgreiðslur stöðvast ef gögn berast ekki til LSR innan þess tíma sem gefinn er upp.
Lífeyrisgreiðslur sem stöðvast eru greiddar afturvirkt, að hámarki 4 ár í samræmi við fyrningarlög, skili sjóðfélagi inn fullnægjandi gögnum sem staðfesta rétt á áframhaldandi greiðslum.
Árleg staðfesting
- Eftirlaun: Innskráning á Mínar síður
- Makalífeyrir: Staðfesting á hjúskaparstöðu
- Örorkulífeyrir: Skattframtal
B-deild: Samningar milli Norðurlanda
Samkvæmt samkomulagi Danmerkur, Finnlands, Íslands, Noregs og Svíþjóðar um samræmingu lífeyrisréttinda ber hverju aðildarlandi að líta til lengdar á ráðningartíma og iðgjaldagreiðslutíma í öðru aðildarlandi við mat á því hvort ríkisstarfsmaður hafi öðlast rétt til lífeyris. Þetta hefur þau áhrif á B-deild að ef sjóðfélagi deildarinnar hefur unnið sem ríkisstarfsmaður á hinum Norðurlöndunum þá má telja þann tíma með við útreikning á 95 ára reglunni.
Skattlagning á lífeyristekjum
Eftirlauna- og lífeyrisþegar sem búsettir eru í landi sem er með tvísköttunarsamning við Ísland geta sótt um undanþágu frá skattlagningu lífeyristekna. Það er gert með því að fylla út sérstakt eyðublað hjá Skattinum og senda þeim ásamt nauðsynlegum fylgigögnum. Ef Skatturinn samþykkir að lífeyrisgreiðslur LSR séu undanþegnar skattlagningu á Íslandi fær LSR tilkynningu um það. Athugaðu að undanþágan gildir aðeins eitt ár í senn og þarf því að sækja um hana árlega.