LSR hefur hagsmuni sjóðfélaga að leiðarljósi við mótun fjárfestingarstefnu og við ávöxtun eigna. Ein af þeim skyldum sem hvíla á LSR er að setja sér siðferðileg viðmið í fjárfestingum, sbr. 36. gr. laga nr. 129/1997 um skyldutryggingu lífeyrisréttinda og starfsemi lífeyrissjóða. 

Reglugerð Evrópuþingsins og -ráðsins (ESB) 2019/2088 hefur jafnframt verið innleidd í íslenskan rétt með lögum um sjálfbærniupplýsingagjöf á sviði fjármálaþjónustu og flokkunarkerfi fyrir sjálfbærar fjárfestingar. Reglugerðinni er ætlað að tryggja samræmdar upplýsingar um hvernig aðilar á fjármálamarkaði meta áhættu tengda sjálfbærni og hvernig taka eigi tillit til helstu neikvæðra áhrifa sjálfbærniþátta við fjárfestingaákvarðanir. 

Við mat á fjárfestingum eru greind möguleg neikvæð áhrif sem fjárfestingin kann að hafa, með hliðsjón af sjálfbærni- og fjárfestingarstefnu sjóðsins. LSR hefur mótað sér verklag um ábyrgar fjárfestingar en sjóðurinn gerir kröfu til þess að fyrirtæki sem hann fjárfestir í starfi í samræmi við samfélagsleg gildi, viðurkenndar leiðbeiningar um stjórnarhætti fyrirtækja og sýni ábyrgð í umhverfismálum. LSR er meðlimur UN PRI – viðmiðum Sameinuðu þjóðanna um ábyrgar fjárfestingar (e. UN PRI – Principles for Responsible Investment) og hefur sjóðurinn þar með skuldbundið sig til að horfa til umhverfislegra þátta, félagslegra þátta og stjórnarhátta (UFS) við mat og ákvarðanir á fjárfestingum. 

Við fyrstu fjárfestingu í félagi eða sjóði er sendur spurningalisti á mótaðila þar sem m.a. er spurt um með hvaða hætti sé hugað að slíkum þáttum í starfseminni og hvort til staðar séu viðmið og stefna um sjálfbærni. Til viðbótar er horft til annarra sjálfbærniupplýsinga sem fyrir liggja. Á þetta bæði við innlendar og erlendar fjárfestingar. 

LSR hefur tileinkað sér viðmið PRI um ábyrgar fjárfestingar og innleiðir þær áherslur við mat og greiningu sjálfbærniupplýsinga. 

Loftslagsbreytingar

LSR leitast við að draga úr vistspori sjóðsins með markvissum aðgerðum. Sjóðurinn vill vera til fyrirmyndar þegar kemur að umhverfismálum og hafa þannig góð áhrif á nærumhverfið sitt og samfélagið í heild. Sjóðurinn rekur eina skrifstofu í Reykjavík og er starfsemin með þeim hætti að bein umhverfisáhrif af rekstri sjóðsins eru óveruleg. Þrátt fyrir að reksturinn (umfang 1 og 2) sem slíkur sé ekki líklegur til að hafa skaðleg áhrif á umhverfið telur LSR mikilvægt að gæta að þessum áhrifum og er umhverfissjónarmiða gætt í hvívetna innan reksturs LSR. Helstu umhverfisáhrifa sjóðsins ber að gæta innan umfangs 3, vegna fjárfestinga sjóðsins og útlána.

Mannauður

LSR leggur áherslu á jafnrétti í starfsemi sinni og setur heilbrigt og öruggt starfsumhverfi í forgang. Lögð er áhersla á að starfsfólki líði vel í starfi, bæði hvað varðar starfsumhverfi og starfsanda, auk þess að samhugur, samstarf og gagnkvæm virðing ríki milli starfsfólks. Mannréttindi eru grundvallarréttindi og er áhersla lögð á að allt starfsfólk LSR sé metið að verðleikum og njóti jafnra tækifæra. Mannauðsstefnu sjóðsins er m.a. ætlað að vera hvatning jafnt fyrir starfsfólk og stjórnendur til þess að skapa faglegt, krefjandi, skemmtilegt og fjölskylduvænt vinnuumhverfi.

Samfélag

Mikilvægt er fyrir sjóðinn sem langtímafjárfesti að huga að áhrifum fjárfestinga sinna á samfélagið. Þótt eigin rekstur sjóðsins (umfang 1 og 2) hafi ekki bein áhrif á samfélagið, hafa fjárfestingaákvarðanir hans (umfang 3) óbein áhrif, bæði þegar kemur að ákveðnum atvinnugreinum, landsvæðum og samfélaginu í heild og því er mikilvægt að sjóðurinn starfi í samræmi við ábyrga og sjálfbæra fjárfestingarstefnu. Með því að greina samfélagsleg áhrif, áhættu og tækifæri getur sjóðurinn haft jákvæð áhrif, dregið úr neikvæðum afleiðingum og varið langtímaávöxtun sjóðfélaga.

Sjóðfélagar

Sjóðurinn leggur áherslu á gagnsæi og sanngirni í störfum sínum, stuðlar að langtímaverðmætasköpun fyrir sjóðfélaga og tryggir að hagsmuna þeirra sé gætt í hvívetna . Með því að fylgja eftir ábyrgri fjárfestingastefnu, tryggja skýra og aðgengilega upplýsingagjöf og stuðla að virku samtali við sjóðfélaga leitast sjóðurinn við að efla traust, taka upplýstar ákvarðanir og tryggja að starfsemi sjóðsins þjóni þörfum og væntingum þeirra sem á henni byggja. Með þessu móti vill sjóðurinn skapa stöðugleika og öryggi fyrir sjóðfélaga til lengri tíma litið.

Viðskiptasiðferði

Góðir stjórnarhættir eru grunnstoð í rekstri LSR og tryggja faglega, gagnsæja og ábyrga meðferð á fjármunum sjóðfélaga. Með skýru regluverki ásamt ábyrgu og virku eftirliti auka góðir stjórnarhættir traust, draga úr áhættu og styrkja langtímaafkomu sjóðsins. Það er því lykilatriði að stjórnun sjóðsins byggi á viðurkenndum meginreglum um góða stjórnarhætti og viðskiptasiðferði.

LSR horfir til alþjóðlegra viðmiða og samstarfs á sviði sjálfbærni. Sjóðurinn vill vera ábyrgur fjárfestir og hefur því innleitt og eflt sjálfbærniþætti sem styðja við fjárfestingarmarkmið og áherslur sjóðsins. Nánar er fjallað um samstarf sjóðsins á þessu sviði í sjálfbærnistefnu sjóðsins sem má finna hér efst á síðunni.

Mikilvægur þáttur í því að fylgja eftir sjálfbærnistefnu er að greina UFS-upplýsingar og birta niðurstöður opinberlega. Í sjálfbærnistefnu hvetur LSR þau félög sem sjóðurinn fjárfestir í til að sýna gagnsæi og skýra frá því með opinberum hætti hvernig starfsemi félaganna samræmist viðurkenndum viðmiðum hvað varðar t.d. sjálfbæran rekstur. Hlutverk LSR sem fjárfestis er að greina þessar upplýsingar fyrir einstakar fjárfestingar og eignasafnið í heild sinni og skoða árangur af fjárfestingarstarfseminni.

Umhverfislegir þættir

Það er stefna sjóðsins að fyrirtæki gæti að umhverfislegum áhrifum í starfsemi sinni og nær það t.a.m. til orkunýtingar, kolefnisfótspors, líffræðilegs fjölbreytileika, vatnsnotkunar og úrgangsstjórnunar. Einnig er mælst til að fyrirtæki skilgreini hvernig tekist er á við loftslagsbreytingar með vísun í mótvægis- og aðlögunaraðgerðir.

Félagslegir þættir

Sjóðurinn telur mikilvægt að horfa til þeirra áhrifa sem starfsemi fyrirtækja getur haft á samfélag, ásamt því að stuðla að fjölbreytileika, jafnrétti, mannréttindum, góðum samskiptum, upplýsingaöryggi ásamt stjórnun og yfirsýn á virðiskeðju. Huga skal að því hvernig fyrirtæki koma fram við starfsfólk sitt, viðskiptavini, birgja og hagaðila. Jafnframt er mikilvægt að farið sé að lögum og reglum hvað varðar kjör og aðbúnað starfsfólks og annarra hagaðila.  

Stjórnarhættir

Góðir stjórnarhættir eru grunnstoð í rekstri LSR. Stjórnarhættir ná meðal annars yfir stjórnun fyrirtækja, innra eftirlit og réttindi hluthafa. Einnig er horft til samsetningar og uppbyggingu stjórnar og stjórnenda, skilgreiningar á sjálfbærniferlum, sjálfbærnieftirlits og eftirfylgni. Stjórnarhættir ná einnig til launakjara stjórnenda, pólitískra framlaga, hagsmunagæslu og skilgreindra verkferla til að sporna við mútum og spillingu.