Iðgjald og ávinnsla
Almennt
Í A-deild greiðir þú 4% iðgjald af heildarlaunum en mótframlag launagreiðanda er breytilegt, nú 11,5%. Bæði þú og launagreiðandi, greiðið ykkar hluta iðgjalds svo lengi sem þú ert í starfi sem veitir þér aðild að sjóðnum. Þó greiðir þú aldrei lengur til A-deildarinnar en til loka þess mánaðar sem þú verður 70 ára.
A-deild LSR er stigasjóður þar sem samanlögð iðgjöld þín hvert almanaksár eru umreiknuð í stig sem mynda grundvöll til réttindaávinnings.
Réttindaávinningur þinn í A-deild ræðst eingöngu af iðgjaldagreiðslum. Því hærra iðgjald sem greitt er þeim mun hærri verður lífeyrir þegar taka hans hefst. Lífeyrir reiknast samkvæmt stigakerfi en hvert stig er fundið sem hlutfall af svokallaðri grundvallarfjárhæð.
Grundvallarfjárhæðin er kr. 110.072 í apríl 2012 og breytist samkvæmt vísitölu neysluverðs en á þann hátt eru lífeyrisréttindi í A-deild verðtryggð.
Hafir þú greitt af launum, sem voru jafnhá grundvallarfjárhæðinni, færð þú 1,0 stig fyrir það ár. Ef laun þín voru helmingur af grundvallarfjárhæðinni færð þú 0,5 stig fyrir umrætt ár. Ef laun þín voru aftur á móti tvöföld grundvallarfjárhæðin færð þú 2,0 stig fyrir það ár.
Í A-deild safnar þú sem nemur 1,9% réttindum af meðallaunum hvers árs. Því er unnt að finna heildarréttindi með eftirfarandi þumalputtareglu: meðallaun mánaðar*1,9%*árafjöldi sem er eftir í starfi.
Dæmi:
Árið 2010 er Jón með kr. 300.000 mánaðarlaun. Í hverjum mánuði greiðir hann kr. 12.000 í iðgjöld til A-deildar LSR. Jón er því búinn að greiða kr. 144.000 í iðgjöld vegna ársins 2010 af heildarlaunum kr. 3.600.000. Í apríl 2011 er grundvallarfjárhæðin er kr. 103.606.
Ef við notum til viðmiðunar grundvallarfjárhæð frá apríl 2011 sem var kr. 103.606, þá mun Jón ávinna sér um 2,904 stig fyrir árið 2010:
3.600.000/103.324/12=2,904 stig.