LSR lán
Vextir frá og með 1. apríl 2012
Breytilegir vextir eru 3,60%
Fastir vextir eru 3,90%
Verðtrygging miðast við vísitölu neysluverðs
Vextir lána með breytilegum vöxtum eru endurskoðaðir á þriggja mánaða fresti
Lánsréttur
Það eru ekki aðeins virkir sjóðfélagar sem eiga rétt á LSR-láni, þ.e. þeir sem eru að greiða iðgjald til sjóðsins, heldur einnig þeir sem hafa einhvern tímann greitt til sjóðsins en gera það ekki lengur. Lífeyrisþegar, hvort sem um er að ræða elli-, maka- eða örorkulífeyrisþega, eiga einnig rétt á láni. Þá hafa þeir einnig lánsrétt sem keypt hafa fasteign með áhvílandi láni frá LSR.
Umsóknarferli
-
Sjóðfélagalán er að jafnaði afgreitt á innan við 10 vinnudögum frá því að fullbúin umsókn berst skrifstofu sjóðanna.
-
Þegar skuldabréf hefur verið útbúið og undirritað ásamt tveimur vottum, er því þinglýst hjá sýslumanni. Það er ekki gert samdægurs! Þú getur farið með það sjálf/sjálfur eða látið sjóðinn sjá um það.
-
Að þinglýsingu lokinni er lánið tilbúið til útborgunar.
Lánareglur
Reglur um LSR lán Lífeyrissjóðs starfsmanna ríkisins og Lífeyrissjóðs hjúkrunarfræðinga.
[Samþykktar 24. febrúar 2006. Síðast breytt desember 2009.]
Gildissvið
1. gr.
Reglur þessar taka til útlána Lífeyrissjóðs starfsmanna ríkisins (LSR) og Lífeyrissjóðs hjúkrunarfræðinga (LH) til sjóðfélaga og annarra einstaklinga sem rétt eiga til lántöku samkvæmt reglum þessum. LSR og LH veita einstaklingum lán gegn skuldabréfum tryggðum með veði í fasteign í þeim tilgangi að ávaxta eignir sjóðanna. Lánin nefnast LSR lán.
Lánsréttur
2. gr.
Hver sá sem greiðir eða hefur greitt iðgjald til LSR eða LH á rétt á LSR láni samkvæmt þessum reglum. Sama rétt á hver sá sem átt gæti aðild að A-deild LSR, þótt hann hafi ekki greitt til sjóðsins, en það eru þeir sem eiga rétt til aðildar að stéttarfélögum opinberra starfsmanna en greiða ekki iðgjald til LSR. Einstaklingur sem tekið hefur yfir sjóðfélagalán fyrir skuldaraskipti eða er eigandi fasteignar sem sett hefur verið að veði fyrir sjóðfélagaláni á rétt á sjóðfélagaláni þó hann uppfylli ekki skilyrði 1. mgr., svo fremi hann uppfylli aðrar kröfur sem sjóðirnir gera.
Lánsupphæðir
3. gr.
Hámark sjóðfélagaláns er ekki bundið tiltekinni fjárhæð. Umsækjandi þarf hins vegar að uppfylla kröfur um veðtryggingu, sbr. 4. gr., og greiðslumat, sbr. 6. gr. Lánstími sjóðfélagalána er 5 til 40 ár. Unnt er að velja á milli fastra og breytilegra vaxta, sbr. 11. gr. Heimilt er að breyta breytilegum vöxtum í fasta vexti eftir útgáfu skuldabréfs.
Gjalddagar og tegund lána
Gjalddagar eru 2-3-4-6 eða 12 á ári eftir vali lántakanda.
Lántaki getur valið á milli láns með jöfnum afborgunum og láns með jöfnum greiðslum vaxta og afborgana (annuitetsláns).
Veðtrygging
4. gr.
Sjóðfélagalán er einungis veitt gegn veði í íbúðarhúsnæði. Fjárhæð þess láns sem sótt er um, ásamt lánum sem framar standa í veðröð, má að hámarki vera 65% af fasteignamati samkvæmt skrá Fasteignamats ríkisins og ekki hærri en samtala brunabótamats og lóðarmats.
Ef talið er sýnt að markaðsverð er hærra en mat FMR er heimilt að lána allt að 65% af metnu markaðsvirði fasteignar, eins og það er metið af löggiltum fasteignasala. LSR má hafna slíku mati eða óska eftir endurmati af aðila sem LSR tilnefnir. Söluverð samkvæmt kaupsamningi kemur eftir atvikum í stað verðmats löggilts fasteignarsala.
Ef boðið er veð í jörð skal hún vera í ábúð og er hámark láns þá aðeins miðað við 65% af verðmæti íbúðarhúsnæðis á jörðinni, skv. 1. gr. Þó er heimilt að miða hámark láns við 65% af fasteignamati íbúðarhúsnæðis á jörð margfölduðu með hlutfallinu 1,2.
Hús í smíðum telst veðhæft ef það er metið fokhelt og er brunatryggt og metið veðhæft, sbr. 1.og 2. mgr. Skerða má lánsfjárhæð eða hafna lánveitingu með öllu ef verðmæti hins framboðna veðs er lægra en 6 milljónir. Sama gildir ef eign er mjög gömul eða ef hún er á markaðssvæði þar sem hús eru ill- eða óseljanleg. LSR og LH áskilja sér rétt til að krefjast mats á fasteign telji þeir þess þörf, sem og annarra þeirra gagna eftir því sem þurfa þykir.
Kostnaður við mat löggilts fasteignasala og öflun gagna skal allur greiddur af lánsumsækjanda.
Heimilt er að veita lán gegn veði í fasteign sem háð er ákvæðum laga um félagslegt húsnæði ef minnst 15 ár eru liðin frá útgáfu afsals til eiganda eða kvöð er aflétt.
Lánsveð: Ef lántakandi er ekki eigandi fasteignar sem er boðin til tryggingar, þarf eigandi hinnar veðsettu eignar að staðfesta með undirskrift sinni að honum hafi verið kynntar upplýsingar sem gefnar eru út af LSR/LH um þýðingu veðsetningarinnar og yfirlýsingu þess efnis að honum hafi verið kynnt mat á greiðslugetu umsækjanda. Frá hausti 2009 eru LSR lán ekki veitt gegn lánsveði.
Lánsumsókn og afgreiðslutími
5. gr.
Lánsumsókn skal skilað á formi sem sjóðurinn býður hverju sinni. Áður en lánið er afgreitt skal umsækjandi skila veðbókarvottorði um þá eign sem veðsetja skal, fullgerðu greiðslumati sem og öðrum þeim gögnum sem sjóðirnir óska eftir vegna afgreiðslu lánsumsóknarinnar.
Sjóðfélagalán er að jafnaði afgreitt á innan við 10 vinnudögum frá því að fullbúin umsókn berst skrifstofu sjóðanna.
Mat á greiðslugetu
6. gr.
Ef samanlögð fjárhæð láns, sem sótt er um og eldri lána umsækjanda er lægri en tíu milljónir skilar lánsumsækjandi yfirlýsingu um eigin greiðslugetu á þar til gerðu eyðublaði sjóðanna. Ef samanlögð fjárhæð lána umsækjanda er yfir tíu milljónir skal liggja fyrir greiðslumat sem unnið er af sjóðunum eða viðurkenndri fjármálastofnun. Í þeim tilvikum skal umsækjandi skila með umsókn þeim gögnum sem LSR og LH telja nauðsynleg vegna greiðslumats.
Þegar umsækjandi um lán er ekki eigandi hinnar veðsettu eignar skal liggja fyrir greiðslumat, sbr. 2. mgr. Af matinu þarf að vera unnt að sjá með greinargóðum hætti að umsækjandi sé líklegur til að geta staðið undir greiðslubyrði þess láns sem hann sækir um.
LSR og LH áskilja sér ávallt rétt til að fara fram á greiðslumat vegna lánsumsóknar, telji þeir þess þörf.
LSR og LH er heimilt að hafna umsókn um lán þegar ekki er sýnt fram á fullnægjandi greiðslugetu eða ef það er mat þeirra að vafi leiki á um greiðslugetu umsækjanda.
LSR og LH áskilja sér rétt til að krefjast afrits af þeim gögnum sem yfirlýsing um greiðslugetu vegna umsóknar um sjóðfélagalán, eða greiðslumat, byggja á.
Uppgreiðsla
7.gr.
Lántakanda er heimilt að greiða lán sitt upp hvenær sem er á lánstímanum án sérstakrar þóknunar.
Lántökukostnaður og innheimtukostnaður
8. gr.
Lántökugjald er 1% af lánsfjárhæð.
Önnur gjöld, svo sem vegna innheimtu og sérstakrar skjalagerðar, greiðast samkvæmt verðskrá.
Um ákvörðun vaxta sjóðfélagalána
9. gr.
Vextir sjóðfélagalána með breytilegum vöxtum eru endurskoðaðir fjórum sinnum á ári af stjórn LSR og LH, í janúar, apríl, júlí og október.
Fastir vextir nýrra sjóðsfélagalána breytast samkvæmt ákvörðun stjórna LSR og LH.
Sértæk úrræði og lánanefnd
10. gr.
Stjórnir LSR og LH setja sameiginlegar reglur um innheimtur og úrræði fyrir lántaka LSR lána vegna greiðsluvanda og vanefnda. Vísa má lánamálum til þriggja manna lánanefndar sem í sitja framkvæmdastjóri, lögfræðingur og fjármálastjóri og forstöðumaður eignastýringar til vara.
Gildistaka og önnur ákvæði
11. gr.
Reglur þessar öðlast þegar gildi.