Eignasamsetning
Eigna- og áhættudreifing
Mikil eigna- og áhættudreifing er í eignasafni LSR og LH. Eignir LSR og LH skiptast niður á fjölmarga eignaflokka, þar sem innlend skuldabréf með ábyrgð ríkisins eru stærsti einstaki eignaflokkurinn. Innlend og erlend skuldabréf telja um 56% af verðbréfasafni LSR og má sjá skiptingu þeirra hér að neðan.
Mikil dreifing er í erlendu eignasafni LSR og LH. Erlendar eignir eru ríflega þriðjungur af eignasafni sjóðanna, dreifast á öll landssvæði heimsins og er skiptingin eftirfarandi: 53% erlendra eigna er fjárfest í N-Ameríku, 31% í Evrópu, 11% í Kyrrahafslöndum og 5% í þróunarmörkuðum heimsins.
Auk þess að dreifa eignum á ólík landssvæði þá dreifist innlent og erlent verðbréfasafn m.a. á ólíkar atvinnugreinar og ólíka fjárfestingarstíla, s.s. virðisfjárfestingar, vaxtafjárfestingar og vísitölufjárfestingar.
Sundurliðun á eignum einstakra deilda LSR og LH
B-deild LSR er stærst deilda innan LSR og nam verðbréfaeign hennar 198,4 mö.kr. í árslok 2010. Verðbréfaeign A-deildar var 159,4 ma.kr. og verðbréfaeign Séreignar var rúmir 8,8 ma.kr. í lok árs. Eignir lífeyrissjóðs hjúkrunarfræðinga í verðbréfum námu 23,3 mö.kr. í lok árs. Hér má sjá niðurbrot eigna niður á deildir og einstaka flokka verðbréfa í safni LSR og LH.
Breyting verðbréfaeignar frá fyrra ári
Samsetning eigna hefur breyst nokkuð frá fyrra ári. Vægi innlendra skuldabréfa er nú 60,0% af heildarverðbréfaeign samanborið við 54,7% árið áður. Vægi erlendra skuldabréfa er 0,4% í stað 0,8% áður. Vægi erlendra hlutabréfa hefur minnkað úr 33,3% í 28,5% og vægi innlendra hlutabréfa hefur aukist úr 1,1% í 1,6%. Vægi annarra fjárfestinga er 4,9% í stað 4,3% árið áður og innlán eru 4,6% af eignum í stað 5,8% árið 2009.
