Örorkulífeyrir
Trygging vegna skertrar starfsorku
Örorkulífeyrir aðstoðar við að bæta upp tekjumissi sjóðfélaga sem hafa þurft að minnka við sig vinnu eða látið af störfum vegna sjúkdóms eða slyss.
Við mat á rétti til örorkulífeyris
Sjóðfélagar í B-deild, sem þurfa að minnka við sig vinnu eða hætta störfum sökum orkutaps sem metin er 10% eða meira, eiga rétt á örorkulífeyri.
Við mat á orkutapi er aðallega miðað við vanhæfni sjóðfélaga til að gegna starfi því er hann hefur gegnt og er tengd aðild hans að sjóðnum.
Þrátt fyrir örorku á enginn rétt á örorkulífeyri meðan hann heldur fullum föstum launum fyrir starf það er hann gegndi eða fær jafnhá laun fyrir annað starf.
Fjárhæð örorkulífeyris
Örorkulífeyrir tekur mið af örorkumati. Fjárhæð örorkulífeyris fer eftir þeim réttindum sem sjóðfélagi hefur áunnið sér við starfsorkutap.
Þegar örorka er metin 75% eða meira er rétturinn hinn sami og áunninn ellilífeyrisréttur.
Ef rekja má aðalorsök örorku til starfs er réttur framreiknaður til 65 ára aldurs. Auk áunninna réttinda er þá reiknað með þeim réttindum sem sjóðfélagi hefði áunnið sér hjá sjóðnum ef greitt hefði verið til 65 ára aldurs.