Viðburðaríkur maímánuður
Árlega heldur LSR kynningarfundi fyrir sjóðfélaga og lífeyrisþega með það að markmiði að efla upplýsingagjöf og vitund um lífeyrismál. Metþátttaka var á kynningarfundum í ár en yfir 350 sjóðfélagar á lífeyri sátu kynningar- og samráðsfund þann 10. maí sl. og yfir 350 sjóðfélagar sóttu kynningar- og fræðslufundi um lífeyrismál dagana 18. og 19. maí sl.
LSR heldur einnig kynningar – og fræðslufundi á vinnustöðum þegar eftir því er leitað, ásamt því að mæta með fræðsluerindi inn á námskeið á vegum stéttarfélaga.
Stefnt er að því að fjölga kynningarfundum framvegis til að koma til móts við aukinn áhuga á fræðslu um lífeyrismál. Fræðsla um lífeyrismál er mikilvæg og LSR fagnar auknum áhuga sjóðfélaga á að fræðast um sinn lífeyrisrétt.
Í maí hlaut LSR viðurkenningu SFR sem fyrirmyndarstofnun 2016 en árlega gerir SFR könnun á meðal starfsmanna fyrirtækja og stofnana á opinberum og almennum markaði á starfsánægju starfsmanna, aðbúnaði á vinnustað og fleiri þáttum sem snúa að starfsmönnum. Hjá LSR tóku allir starfsmenn lífeyrissjóðsins þátt í könnuninni, óháð því hvort þeir væru félagsmenn í SFR eða öðrum stéttarfélögum.
Niðurstaðan var mjög ánægjuleg fyrir lífeyrissjóðinn og var LSR eitt af þeim fyrirtækjum sem hlutu viðurkenningu sem fyrirmyndarstofnun SFR árið 2016.